مراجعة للعبة العظيمة Uncharted 4

"I am a Man of Fortune, and I must seek my Fortune."
  Henry Avery, 1694

ناتي دوج وجمال وحلاوة ألعاب شركة ناتي دوج 
اللي ميعرفش الشركة دي هي اللي مشهورة بسلسلة كراش بانديكوت للجيل القديم وسلسلة uncharted و السلسلة اللي دخلت قلوب الملايين عالكوكب The last of us
افتكر بداية شرائي للبلايستشن 3 في 2007 كانت مع نزول اول جزء لانتشارتد وازاي كنت مغفلة جدًا لدرجة اني اشتري لعبة بيوولف اللي هي تعتبر من الألعاب اللي ندمت على شراءها بدل ما اشتري أول جزء لانتشارتد أو لعبة تومب رايدر آندروورلد
طبعًا أنا صلحت غلطي بعد كده .. واشتريت اللعبة العظيمة دي .. آنتشارتد ❤

في ناس بتقول إن ناتي دوج بتقلد سكوير انكس "موضوع إن انتشارتد بيسرق من تومب رايدر" والكلام ده ، هو آه هما مقتبسين لعبتهم من تومب ريدر ودي مش حاجة محتاجة فقاقة يعني عشان تتعرف لأن بتوع ناتي دوج ذات نفسهم قالوا كده بس طوروا لعبتهم وخلوها تاخد منحنى تاني ، وهي مش سرقة لأن قصة سلسلتهم غير قصة سلسلة تومب رايدر خالص، وحتى سكوير انكس اتأثرت بسلسلة آنتشارتد في الجيم بلاي بتاعها في الاجزاء الجديدة من سنة 2013 لما نزلوا لعبة Tomb raider و 2015 لما نزلوا rise of TR
المهم يعني انا مبحبش الحرب اللي قايمة ما بين بتوع تومب رايدر احسن لا انتشارتد اجمل .. الخ
خلونا نتكلم عن آنتشارتد .. وعن جمال اللعبة اللي هتبهركوا بكل تفاصيلها من حيث قصة وأداء شخصيات ودراما وألغاز وغموض وأعداء ومقولات عظيمة .. وموسيقى تعتبر من أحلى الحاجات اللي جات في عالم الألعاب 
بالنسبة لي كان الجزء 3 هو من اكتر الأجزاء اللي حبيتها .. وبعد كده باقي الأجزاء
بس الجزء ده جميل خصوصا لو انتوا بتحبوا جو الحكايات اللي بتتقال عن القراصنة فهيعجبكوا الجزء ده جدا وخصوصا الدراما اللي كانت فيه وإنه اهتم أكتر بالجزء الانساني في شخصية بطلنا نايثان دريك اكتر من أي جزء
ده الفيديو بتاع المراجعة ويارب يعجبكم ❤